సూర్ దాస్, తులసీ దాస్, మీరా మొదలైనవారి భజన్స్ లో మీరా భజన్స్ చాలా ప్రాచుర్యాన్ని పొందాయి. మీరా భజనల్లో కృష్ణ భక్తురాలు "మీరా" పాడిన భజనలలో అత్యంత ప్రఖ్యాతి గాంచిన "జో తుమ్ తోడో పియా" భజన్ చాలా బావుంటుంది. నాకు తెలిసీ మూడు హిందీ సినిమాల్లో ఈ భజన ఉంది. సరదాగా ఈ మూడు వర్షన్స్ ఒకచోట పెడదామన్న ఆలోచన వచ్చింది. మూడిటినీ ఒకేచోట వినేద్దామా...
మొదటిది 1955లో "Jhanak jhanak paayal baaje" సినిమాలోది. దీనిని లతా మంగేష్కర్ పాడారు. వసంత్ దేశాయ్ సంగీతాన్ని సమకూర్చారు.
తరువాత రెండవ వర్షన్ 1979లో గుల్జార్ దర్శకత్వంలో వచ్చిన "Meera" సినిమాలోది. హేమమాలిని మీరాగా నటించిన ఈ సినిమాకు సంగీతాన్ని ప్రసిధ్ధ సితార్ విద్వాంసుడు పండిట్ రవిశంకర్ అద్భుతమైన సంగీతాన్ని అందించారు. ఈ భజనను అత్యంత మధురంగా పాడినది విశిష్ఠగాయని వాణి జయరాం. ఈ సినిమాలో వాణిజయరాం పాడిన అన్ని మీరా భజన్స్ ఎంతో బావుంటాయి. వాణి జయరాం గొంతులో అత్యంత మధురంగానూ, మధ్య మధ్య వచ్చే అందమైన సితార్ వాదన తోనూ ఉన్న ఈ రెండవ వర్షన్ నాకు చాలా ఇష్టం.
మూడవ వర్షన్ 1981 లో "Silsila" కోసం చేసారు. శివ్-హరి సంగీత సారధ్యంలో ఇరవై ఆరేళ్ల తరువాత అదే భజనను లతా మంగేష్కర్ ఈ సినిమా కోసం మళ్ళీ పాడారు.
