మన తెలుగువారికి తెరపై కృష్ణుడంటే ఎన్టీఆరే. ఆ రూపాన్ని తెరపై చూసిన తరువాత నిజంగా కృష్ణుడు ఇలానే ఉంటాడేమో అనుకునేవారు అందరూ. అసలు మరే ఇతర నటుడినీ ఆ రూపంలో ఊహించుకోలేరు కూడా మన తెలుగు ప్రేక్షకులు. మన తెలుగు పౌరాణిక చిత్రాల కన్నా గొప్ప పౌరాణిక చిత్రాలు మరే ఇతర భాషల్లోనూ రాలేదేమో అనుకుంటూ ఉంటాను నేను. వాటిలో కొన్ని కాల్పనీకాలైనా కూడా మనకు ఎంతో ప్రియమైనవి మన పౌరాణిక చిత్రాలు. తెలుగు సినిమాని ఒక స్థాయిలో నిలబెట్టిన ఘనత మన పౌరాణికాలకే దక్కుతుంది అంటే అతిశయోక్తి కాదు మరి!
అలా ఎన్టీఆర్ గారిని మాత్రమే కృష్ణుడి రూపంలో ఊహించుకుంటూ పెరిగిన తరువాత స్కూల్ డేస్ లో టివీ మహాభారత్ లో నితిష్ భరద్వాజ్ గారిని చూశాం. ఆయన కూడా కృష్ణుడిగా బాగా మెప్పించారు. తర్వాత ఐదారేళ్ల క్రితమేమో "రాధాకృష్ణ" అనే హిందీ సిరీస్ డిస్నీ హాట్ స్టార్ ఛానల్ లో ప్రసారమైంది. స్టార్ భారత్ లో కూడా వచ్చినట్లుంది. దాదాపు 1145 ఎపిసోడ్ల ఆ వెబ్ సిరీస్ సీజన్ వన్ అయ్యాకా మాకు తెలిసింది. కరోనా కాలంలో అనుకుంటా నేనూ, మా కృష్ణ భక్తురాలు కలిసి ఒక ఐదురోజుల్లో మొత్తం మొదటి సీజన్ భాగాలన్నీ రాత్రిపగలు కూర్చుని అదే పనిగా పరీక్ష రాసేవారిలా గబగబా అన్ని భాగాలూ చూసేసి, అప్పుడు నడుస్తున్న రెండవ సీజన్ భాగానికి చేరుకున్నాం నేనూ, మా భక్తురాలు. మాకు అంతగా నచ్చేసింది ఆ సీరియల్.
అందులో పాటలు మా ఫోనుల్లో ఎప్పుడూ ప్లే అవుతూ ఉంటాయి ఇప్పటికీ. అందులో కృష్ణుడిగా నటించిన సుమేధ్ ముద్గల్కర్ కి మేము పెద్ద పంఖాలయిపోయాము. ఆ కధలో చాలావరకూ కాల్పనికత జోడించారు. వాస్తవికతకు, అసలు భాగవత కథకు ఎంతో దూరంగా ఉండే ఎన్నో ఘట్టాలు నచ్చనివి ఉన్నాయి. మధ్య మధ్య కొన్ని చిరాకు తెప్పించే కంసుడి ఎపిసోడ్స్, బర్సానా లో జరిగే పిట్టకథల భాగాలు అన్నీ కూడా స్కిప్ చేసేస్తే, మొత్తమ్మీద ఆ సీరియల్ నాకెంతో నచ్చింది. ఎన్నో మార్పులకు కారణం అయ్యింది. రామారావుగారి తర్వాత మోడ్రన్ కృష్ణుడంటే సుమేధే! అన్న నిర్ణయానికి వచ్చాము. వేరే మహాభారతం సీరియల్ ఒక చోట వచ్చేది కానీ నేను అది చూడలేదు. ఆ కృష్ణుడు నాకు నచ్చలేదు. సుమేధ్ ని చూసిన కళ్లతో ఇంకెవరినీ చూడలేము అనుకునేవాళ్ళం.
అలాంటి సమయంలో ఒక ట్రైలర్ చూపెట్టి, ఈ సినిమా మనం తప్పకుండా చూడాలి, వెళ్దాం అంది మా కృష్ణ భక్తురాలు. అమ్మో.. ఈ మోడ్రన్ జమానాలో పౌరాణికమా? అది కూడా కొత్త నటులా..నన్ను వదిలేయ్యవే అన్నా. ఇది తప్పకుండా బావుంటుందమ్మా రమ్మని మా కృష్ణ భక్తురాలు నేను ఒప్పుకునేదాకా వదల్లేదు. ఎందుకైనా మంచిదని రివ్యూలు వెతికితే పోజిటివ్గానే ఉన్నాయి. సరే పదమన్నాను. ఇవాళ వెళ్ళి వచ్చాము. ఇక మాటల్లేవ్!! It's a stunning visual feast, a retreat too.
అంత మంచి చిత్రాన్ని తీసిన దర్శకుడికి చేతులెత్తి దణ్ణం పెట్టచ్చు. తప్పక చూసితీరవలసిన చిత్రం. కృష్ణతత్వాన్ని ఒక సరికొత్త కోణంలో చూపెట్టారనే చెప్పాలి. సగభాగం యువత, నాశనమయ్యే బాటలో పయనిస్తున్న ఈ రోజుల్లో ఇటువంటి సినిమాలు తప్పక రావాలి. ప్రజల మధ్యకు బాగా వెళ్లాలి. ఎక్కువ థియేటర్లే లేవు, మా ఊళ్ళో రాలేదు, ఎక్కువ షోస్ లేవు అంటూ చాలామంది రాసిన కామెంట్లు ఈ సినిమా ట్రైలర్,పాటల కిందన చదివాను. బాధ అనిపించింది. యువతను తప్పుదోవ పట్టించే సినిమాలకు ఉండే పబ్లిసిటీ ఇటువంటి మంచి చిత్రాలకు ఎందుకు ఉండదో? అనిపించింది. కానీ కృష్ణుడి కధలో బలమే ఈ సినిమాని నడిపిస్తుంది అనే ఆశ అయితే కలిగింది. గోపికలు, అష్ట భార్యలు, అల్లరి, కొంటెతనం ఒక పక్కన పెడితే; మనిషిగా పుట్టినందుకు ఎన్ని అవాంతరాలు సహించాడో, ఎన్నీ యుధ్ధాలు చేశాడో, ఎంత బాధ అనుభవించాడో..కదా అనిపిస్తుంది కృష్ణుడి కథను చూస్తే! మానవాళికి ఎన్ని అద్భుతమైన సందేశాలను అందించాడో కదా! రాముడు ధర్మ మార్గాన్ని చూపెడితే, మన మార్గం ఎలా ఉన్నా సరే జీవితాన్ని ఎలా జీవించాలో కృష్ణుడు చూపెట్టాడు. అందుకే పూర్ణావతారం అంటారేమో కృష్ణావతారాన్ని.
కొత్త నటీనటులతో పౌరాణిక చిత్రం తీయడం ఎంతటి సాహసమో అసలు! ఎక్కడా కూడా అబ్బా ఇలా ఉందేంటి అనిపించలేదు. పాటలు, నేపథ్య సంగీతం, సాహిత్యం, విజువల్స్, నటీనటులందరి నటన, అన్నీ కూడా ఎంతో అందంగా హృద్యంగా ఉన్నాయి. ప్రసాద్ సష్టే గారి సంగీతం మనసుకి హత్తుకునేలా ఉంది. పాటలు అన్నీ ఎంత బావున్నాయో అసలు. మాధవుడు మనోహరుడు కదా. ఆయన గాధ కూడా మనోహరమైనదే. ప్రతి సీన్ ఎంతో రిచ్ గా, అందంగా, ఆహ్లాదకరంగా అనిపించింది. అందునా హాల్లో సినిమా చూసి కూడా చాలా రోజులైంది. ముఖ్యంగా ఈ కొత్త కృష్ణుడు(సిధ్దార్థ్ గుప్తా) కూడా సినిమా పూర్తయ్యేసరికీ చాలా బాగా చేశాడనిపించేసుకున్నాడు. సొంత వాయిస్ అయి ఉంటే గనుక అతని వాయిస్ కూడా చాలా బాగుంది. ఇంతటి గొప్ప, అందమైన దృశ్యకావ్యాన్ని తెరపై మలిచినందుకు దర్శకుడు హార్దిక్ గజ్జర్ గారు అభినందనీయులు. వారు ప్లాన్ చేసిన ట్రయాలజీ(trilogy)లో ఇది మొదటి భాగం. తెలుగులో చూడడానికి కొంచెం సందేహించి, హిందీ చిత్రానికే వెళ్ళము మేము. సినిమా పూర్తయ్యాకా తెలుగు వర్షన్ కూడా బానే ఉండేదేమో అనుకున్నాం. తెలుగు,హిందీ, తమిళ భాషల్లో ఇది విడుదలైందిట. మరో రెండు వారాల తర్వాత ఆంగ్ల వర్షన్ కూడా అంతర్జాతీయంగా రిలీజ్ అవుతుందిట.
ఇతర ఆధ్యాత్మిక గ్రంధాలతో పాటూ, శ్రీ రామ్ మోరి గారు రచించిన గుజరాతీ నవల "సత్యభామ"
పుస్తక ముఖచిత్రం ఎంత అందంగా ఉందో కదా. రచయిత ఎవరో పెద్దాయన అయి ఉంటారని ఇంటికొచ్చాకా నెట్లో వెతికితే ఆయన ఒక యువ కథా రచయిత, స్క్రీన్ రైటర్ కూడా అని తెలిసింది. చాలా సంతోషం వేసింది. ఇటువంటి యువ రచయితల గురించి తెలిసినప్పుడు; మహేష్ కాలే, శివశ్రీ స్కందప్రసాద్ వంటి యువగాయకులు, వినయ్ వారణాసి వంటి ఆధ్యాత్మిక వక్తలను చూసినప్పుడు అమితానందం కలుగుతుంది. సంగీత,సాహిత్యాల భవిష్యత్తు చాలా బాగుంటుంది అనే ఆశాభావం బలపడుతుంది. యువతను సరైన మార్గంలో నడిపేందుకు ఇటువంటి కారణజన్ములు ఎంతో అవసరం.
ఇక మన కృష్ణావతారం, part 1 సినిమా విషయానికి వచ్చేస్తే, తప్పకుండా సకుటుంబసమేతంగా చూసితీరవలసిన సినిమా. పిల్లలకు తప్పకుండా చూపెట్టాల్సినవి ఇటువంటి సినిమాలు. ఆమధ్యన వచ్చిన "మహావతార్ నరసింహ" యానిమేషన్ చిత్రం కూడా చాలా బాగా తీసారు. అది కూడా ఎంతో ప్రజాదరణ పొందింది. మంచి సినిమాలు తీస్తే, చూడడానికి ప్రజలు ఎప్పుడూ తయారుగానే ఉంటారు. పౌరాణికాల పట్ల ఆసక్తి ఉన్నవారంతా తప్పకుండా ఈ చిత్రాన్ని చూసి, ఆ కృష్ణమయ మనోహర ప్రపంచంలో కాసేపు సేదతీరండి.
